2Cor 4 | NdeIBE | STEP | Ngakho, njengoba ngomusa kaNkulunkulu silale imfundiso kasiphelelwa lithemba.

2 Corinthians 4

Inotho Ezimbizeni Zebumba

1 Ngakho, njengoba ngomusa kaNkulunkulu silale imfundiso kasiphelelwa lithemba.

2 Kodwa-ke sizilahlile izindlela zangasese lezilihlazo; kasisebenzisi buqili, loba sihlanekele ilizwi likaNkulunkulu. Kodwa ngokubeka iqiniso obala sizinikela kusazela somuntu wonke phambi kukaNkulunkulu. 3 Lanxa ivangeli lethu limboziwe, limbozwe kulabo ababhubhayo. 4 Unkulunkulu walesisikhathi usenqunde izingqondo zabangakholwayo, ukuze bangakuboni ukukhanya kwevangeli lenkazimulo kaKhristu, ongumfanekiso kaNkulunkulu. 5 Ngoba kasizitshumayeli thina ngokwethu, kodwa uJesu Khristu njengeNkosi, njalo thina njengezinceku zenu ngenxa kaJesu.

6 Ngoba uNkulunkulu owathi, “Ukukhanya kakukhanye emnyameni,” wenza ukukhanya kwakhe kwakhanya ezinhliziyweni zethu ukuba asiphe ukukhanya kokwazi inkazimulo kaNkulunkulu ebusweni bukaKhristu.

7 Kodwa inotho le silayo ezimbizeni zebumba ukubonakalisa ukuthi amandla la amakhulukazi avela kuNkulunkulu hatshi kithi.

8 Sicindezelwe kalukhuni emaceleni wonke, kodwa kasichobozwanga; sididekile, kodwa kasilahlanga ithemba; 9 siyahlukuluzwa, kodwa kasidelwanga; sitshayelwa phansi, kodwa kasibhujiswanga. 10 Sikuthwele njalo nje emizimbeni yethu ukufa kukaJesu, ukuze ukuphila kukaJesu lakho kwambulwe emizimbeni yethu. 11 Ngoba thina abaphilayo sihlezi sinikelwa ekufeni ngenxa kaJesu, ukuze ukuphila kwakhe kwambulwe emizimbeni yethu efayo. 12 Ngakho ukufa kuyasebenza kithi, kodwa ukuphila kuyasebenza kini.

13 Kulotshiwe ukuthi: “Ngakholwa; ngakho sengikhulumile.” Ngawona lowo moya wokukholwa lathi siyakholwa, ngakho siyakhuluma, 14 ngoba siyakwazi ukuthi lowo owavusa iNkosi uJesu kwabafileyo lathi uzasivusa loJesu asethule kanye lani phambi kwakhe. 15 Konke lokhu ngokokusiza lina, ukuze kuthi umusa ofika ebantwini abanengi ungenza ukubonga kwande ukuze kudunyiswe uNkulunkulu.

16 Ngakho kasilahli themba. Lanxa ngaphandle sicikizeka, kodwa ngaphakathi senziwa sibe batsha izinsuku zonke. 17 Ngoba ukukhanya kwethu lezinhlupheko zethu ezincane ezesikhatshana zisizuzela inkazimulo elaphakade enkulu kulazo zonke.

18 Ngakho amehlo ethu kasiwakhangelisanga kokubonakalayo, kodwa kokungabonakaliyo. Ngoba okubonakalayo kuyedlula, kodwa okungabonakaliyo kakuyikuphela.